ဤသို့ပစ္စက္ခအားဖြင့် မှတ်သိရပြီးသော အာရုံနှင့် နှိုင်းဆ၍ အတိတ် အနာဂတ် ပစ္စုပ္ပန် တလောကလုံး၌ ရှိသော ရုပ်နာမ်ဟူသမျှကိုလည်း နည်းတူပင် မမြဲတာတွေချည်းပဲ၊ ဆင်းရဲတွေ မကောင်းတာတွေချည်းပဲ၊ အစိုးမရ ငါကောင် မဟုတ်တာတွေချည်းပဲ ဟူ၍ သဘောကျလျက် ဆင်ခြင်ဆုံးဖြတ်မိတတ်သည်။ ဤဆင်ခြင်ဆုံးဖြတ်မှုသည်ကား
အနုမာနသမ္မသနဥာဏ်မည်၏။ ကောင်းကောင်း ပစ္စုပ္ပန် ကျအောင် မှတ်နိုင်သော အခါ၌၊ အမှတ်ရမှု သတိနှင့် အသိဥာဏ်တို့သည် အလွန်သွက်လက် လျင်မြန်စွာ ဖြစ်ပေါ်ကုန်၏။ အားထုတ်မှု ၀ီရိယသည်လည်း မယုတ်မလွန် မလျော့မတင်း ညီမျှစွာ ဖြစ်၏။ အထူးကြောင့်ကြမစိုက်ရဘဲ မှတ်မိလျက် မှတ်သိလျက် ဖြစ်နေအောင် ညီမျှစေသော ဥပေက္ခာလည်း ထင်ရှားဖြစ်၏။ စိတ်သည် အထူးကြည်လင်၏။ ထူးခြားစွာ ဖြစ်ပေါ်လာသော အလင်းရောင်ကိုလည်း တွေ့ရတတ်၏။ ကိုယ်ထဲ၌ စိမ့်စိမ့်စိမ့်စိမ့် ဖိမ်းဖိမ်းဖိမ်းဖိမ်းနှင့် အလွန်နေထိုင်ကောင်းသော ပီတိလည်း ထင်ရှားဖြစ်ပေါ်၏။ ကြောင့်ကြပူပန်မှုကင်း၍ သက်သာအေးချမ်းသော ပဿဒ္ဓိလည်း ထင်ရှားဖြစ်ပေါ်၏။ ၀မ်းသာဝမ်းမြောက်မှုလည်း အလွန်အကဲ ဖြစ်တတ်၏။ ရှုမှတ်မှု ဘာဝနာ၌ ပျော်မွေ့မှုလည်း ဖြစ်၏။ ထိုအခါ၌ အလွန်လျင်မြန်စွာ ထင်ပေါ်လာသောရုပ်နာမ် အမူအရာတို့ကို ဖြစ်စဉ်အတိုင်း အကြွင်းမရှိ အကုန်ပင် မှတ်သိနိုင်သည်ဟု ထင်ရ၏။ ဤသို့ အလင်းရောင် ပီတိ သုခတို့နှင့်တကွ သက်သက်သာသာနှင့် လျင်မြန်စွာ အမှတ်အသိ ကောင်းနေသောကြောင့် ထိုသို့ ဖြစ်ပုံကို သာယာသဘောကျလျက် တရားလမ်းဆုံးပြီ၊ မဂ်ဖိုလ်နိဗ္ဗာန်သို့ ရောက်ပြီဟု ထင်မှတ်တတ်၏။ မဂ်မှားကို စွဲလန်းသော ဥပက္ကိလေသ ပေတည်း။ ဤဥပက္ကိလေသနှင့် ရောပြွမ်းလျက် လျင်မြန်စွာ မှတ်သိနိုင်သော အသိဥာဏ်သည် ဖြစ်ပေါ်ခါစ အနုသောဥဒယဗ္ဗယဥာဏ်မည်၏။ ဤနုသော ဥဒယဗ္ဗယဥာဏ် ဖြစ်ခိုက်၌ မှတ်သိရသော ရုပ်နာမ်တို့၏ အစအဆုံး အဖြစ်အပျက်များကို ကောင်းကောင်း ရှင်းလင်းစွာ မသိနိုင်သေးပေ။ ထိုသို့မှတ်နေစဉ်မှာပင် အလင်းရောင် စသည်က တရားထူး မဟုတ်သေး။ အလင်းရောင် စသည်ကို စဉ်းစားဆင်ခြင်ကာ သာယာနေတာက ရှုမှတ်မှု၏ အန္တရာယ်ပဲ။ မပြတ်မှတ်နေတာကမှ လမ်းမှန်ပဲ။ လမ်းမဆုံးသေးဘူး။ မှတ်ရဦးမှာပဲ။ မှတ်မှ သာပြီးကောင်းသွားမည်ဟူ၍ တဆင့်ကြားရ၍ ဖြစ်စေ မိမိအလိုလို ဖြစ်စေ ဆုံးဖြတ်၏။ ဤဆုံးဖြတ်မှုသည် မဂ္ဂါမဂ္ဂဥာဏနဒဿ ဝိသုဒ္ဓိမည်၏။ ထိုသို့ ဆုံးဖြတ်ပြီးလျှင် မှတ်မြဲပင် ဆက်၍ မှတ်သောကြောင့် အလင်းရောင် ပီတိ ပဿဒ္ဓိ ၀မ်းသာမှု သာယာမှုတို့ကို လွန်မြောက်သွားသောအခါ၌ မှတ်တိုင်း မှတ်တိုင်း မှတ်မိသော အာရုံများသည် ပေါ်ပေါ်ပြီးလျှင် ချက်ချင်းပင် ပျောက်ပျောက်သွားကြသည်ကို တွေ့ရ၏။ ထိုပျောက်သွားပုံမှာလည်း တခြားတနေရာသို့ ရွှေ့ပြောင်းသွားခြင်း မရှိဘဲ သူပေါ်လာရင်း နေရာမှာပင် တိကနဲ တိကနဲ လုံးဝကွယ်ပျောက်သွားသည့် အနေအားဖြင့် ထင်ရှား၏။ ထို့ကြောင့် ရုပ်နာမ်တို့သည် မျက်စိတမှိတ် လျှပ်တပြက်ခန့်မျှ မတည်တံ့ဘဲ၊ ခဏမစဲ ဖြစ်ပျက်နေကြသည်ဟု မျက်မှောက်သိရ၏။ ဤသို့ ပေါ်လိုက် ပျောက်လိုက်နှင့် ခဏမစဲ ဖြစ်ပျက်နေသော ရုပ်နာမ်တို့ကို မှတ်တိုင်း မှတ်တိုင်း ကွက်ခနဲ ကွက်ခနဲ ရှင်းလင်းစွာသိသော ဥာဏ်သည် ဥပက္ကိလေသမှ လွတ်ပြီးသော ရင့်သန်သော ဥဒယဗ္ဗယဥာဏ်မည်၏။ ဤဥာဏ်သည် ပဋိပဒါဥာဏဒဿ ဝိသုဒ္ဓိ၏ အစပေတည်း။ ပေါ်လိုက် မှတ်လိုက် ပျောက်လိုက်နှင့် ကွက်ခနဲ ကွက်ခနဲ အမှတ်အသိကောင်းနေရာမှ မှတ်ရသော အာရုံများသည် ပျောက်ပျောက်နေနှင့် သကဲ့သို့ လည်းကောင်း၊ ဘာမျှမရှိဘဲ ဖြစ်နေသကဲ့သို့ လည်းကောင်း ထင်ရ၏။ ဖောင်းပိန်သော ဗိုက်ပုံသဏ္ဍာန်၊ ကွေးဆန့်လှုပ်ရှားနေသော လက်ခြေပုံသဏ္ဍာန် စသော ဃနနိမိတ် ပညတ်များ ကွယ်ပျောက်၍ ပရမတ် သဘောမျှကိုသော တွေ့ရသောကြောင့် ထိုကဲ့သို့ ထင်ပေသည်။ ထိုဥာဏ်အားပြည့် ရင့်သန်လာသောအခါ၌ ဖောင်းမှု ပိန်မှု စသော မှတ်စရာ အာရုံနှင့် မှတ်သိသော စိတ်တို့ကို ရှေ့ဆင့်နောက်ဆင့် ကုန်ဆုံးကုန်ဆုံး နေသည်ကိုသာလျှင် မှတ်တိုင်း မှတ်တိုင်း ရှင်းလင်းစွာသိရ၏။ ထိုကုန်ဆုံးမှု ထင်ပုံမှာလည်း မှတ်ရသော အာရုံ၏ အစပေါ်လာမှုနှင့် အထည်ဒြဗ်ကို မတွေ့ရပါဘဲ၊ မှတ်ရန် အားထုတ်စဉ် အားထုတ်စဉ် မှာပင် ကုန်ကုန်သွားနှင့်သကဲ့သို့ လည်းကောင်း ပျောက်ပျောက်သွားနှင့် သကဲ့သို့ လည်းကောင်း ထင်ခြင်း ပေတည်။ ဤသို့ ရှင်းလင်းစွာ ထင်ပေါ်၍ အာရုံရော မှတ်စိတ်ရော အတွဲလိုက် အတွဲလိုက်အားဖြင့် ရှေ့ဆင့်နောက်ဆင့် တိကနဲ တိကနဲ လျင်မြန်စွာ ကုန်ပျက်ကုန်ပျက် သွားသည်ကို သိသောဥာဏ်သည် ဘင်္ဂဥာဏ် မည်၏။ အာရုံရော မှတ်စိတ်ရော အတွဲလိုက် အတွဲလိုက် တကုန်တည်းကုန်၊ တပျက်တည်း ပျက်နေသည်ကိုသာ တွေ့ရ၍ မှတ်နေရင်းပင် ကြောက်စရာကောင်းသည်ဟု ထင်မြင်လာတတ်၏။ ဘယဥာဏ်ပေတည်း။ ထိုအခါ၌ မှတ်တိုင်း မှတ်တိုင်း ကြောက်နေသလိုလိုလည်း ဖြစ်တတ်၏။ ၀မ်းနည်းသလိုလိုလည်း ဖြစ်တတ်၏။ မှတ်စရာအာရုံတွေ ပေါ်ပေါ်လာမည်ကိုလည်း ကြောက်နေတတ်၏။ (၀ိပဿနာရှုနည်းကျမ်းအကျဉ်းချုပ်၊ မဟာစည်ဆရာတော်) (မှတ်ချက်။ ။ကျန်ရှိသောအပိုင်းများကို အပိုင်း-၃ တွင် ပြီးသည်ဆုံးသည်အထိ ဖော်ပြပါမည်)
ကျွန်တော့် blogeသို့ ရောက်ရှိလာကြကုန်သော အရှင်သူမြတ်အပေါင်းတို့အား ဦးထိပ်ပန်ဆင်လျက် ဓမ္မမိတ်ဆွေ ဦးဦး,ဒေါ်ဒေါ်,အကို,အမ,ညီလေး,ညီမလေးတို့အားလုံးအားလေးစားစွာတောင်းဆိုအပ်ပါသည်။ ကျွန်တော်သည် ပြည့်စုံကျွမ်းကျင်သူ မဟုတ်သော ကြောင့် အစစမှာ လိုအပ်ချက်များစွာရှိနေနိုင်ပါသည်။ထို့အတွက်ကြောင့် ကျွန်တော့်၏ လိုအပ်ချက်များကို ဝေဖန်ဆုံးမ အကြံပေး ပြောကြားလိုပါလျှင် ဤနေရာလေးမှ ကျွန်တော်အား တိုက်ရိုက်ရေးသားပေးပို့ပေးပါရန် တောင်းဆိုအပ်ပါသည်။
0 comments:
Post a Comment